Sot, në selinë e Organizatës “LIZA-R”, Drejtori Ekzekutiv Prof. Dr. Mensur Morina, i shoqëruar nga Kryetari i Bordit z. Ujmir Krasniqi dhe stafi profesional i organizatës, kishte kënaqësinë të mirëpriste Ambasadorin e Republikës së Finlandës në Kosovë, Shkëlqesinë e Tij z. Matti Nissinen dhe Këshilltarën e lartë Znj. Jehona Ademaj Sejdiu.
Gjatë takimit, Ambasadori u njoh nga afër me angazhimin dhe kontributin shumëvjeçar të Organizatës “LIZA-R”, e cila tashmë për 18 vite me radhë ka qenë promotore e zhvillimit shoqëror, ekonomik dhe arsimor në rajon. Ambasadori shprehu vlerësimin e tij të lartë për veprimtarinë e organizatës dhe theksoi rëndësinë e bashkëpunimeve të tilla për ndërlidhjen e komuniteteve dhe shteteve tona.
Në shenjë mirënjohjeje për mbështetjen e vazhdueshme të shtetit dhe popullit finlandez në proceset e shtetndërtimit dhe forcimit të institucioneve të Kosovës, Organizata “LIZA-R” i dhuroi Ambasadorit një dhuratë simbolike dhe të çmuar.
Pjesa e dytë e vizitës u fokusua në bashkëpunimin ekonomik. Ambasadori Nissinen dhe znj. Florenda Govori, Drejtoreshë e Odës Ekonomike Nordike, u takuan me përfaqësues të bizneseve nga rajoni i Anamoravës, për të diskutuar mundësitë konkrete të bashkëpunimit me kompani finlandeze. Temat e diskutimit përfshinë eksportin e produkteve vendore, partneritetet industriale dhe forma të reja bashkëpunimi ekonomik ndërmjet Kosovës dhe vendeve nordike.
Përfaqësuesit e komunitetit të biznesit shprehën mirënjohje të veçantë për organizimin e këtij eventi nga “LIZA-R” dhe për përkushtimin e Ambasadorit Nissinen në forcimin e urave të bashkëpunimit midis Kosovës dhe Finlandës.
